Малінавы пасэт

Пасэт – гэта англійскі дэсерт (анг. – posset) на аснове малака ці вяршкоў. Аднак першапачаткова гэта быў напой кшталту глінтвейна, якім саграваліся ў халоднае надвор’е і лячылі прастуду і меланхолію да канца 18 ст..

У 15 ст. нейкі ангельскі алхімік Кенэльм замуціў кактэйль з малака і соладавага элю, і заўважыў, што алкаголь прыводзіць да ссядання малака. Так сабе смаката была, таму што і якасць ачысткі алкаголю і сам эль ў 15 ст. наўрадці былі на высокім узроўні. Смярдзела на ўвесь горад ад такіх эксперыментаў.

Але з цягам часу на замену алкаголю прыйшоў лімон і пасэт выйшаў на новы ўзровень. Тым не менш, лімонны пасэт лічыўся балаўством для жанчын пры двары. Маракі ды ваенная арыстакратыя аддавалі перавагу варыянту Уолтэра Рэйлі: на аснове іспанскага хераса і брытанскага малака. Рэцэпт мужчынскай смакаты быў просты: паўпінты хераса і паўпінты эля нагрэць, дадаць туды кіпячае малако ці вяршкі, цукар і трохі мушкатовага арэха. Перад падачай яшчэ дадаць 2 жаўткі і добра ўзбіць.

Сучасны ж пасэт ператварыўся з гарачага напою на дэсерт з гламурнымі фруктамі і арэхамі. Аднак фішка пасэта – захаваць тую самую нотку перахода з малочнай мяккасці ў алкагольны букет.

Малінавы пасэт

Не будзем чапаць соладавы эль ці херас, прапаную больш лагодны варыянт з шампанскім і малінай. Асцярожна, ад смакаты і лёгкасці можа закружыцца галава. Тое, што і трэба да дня ўсіх закаханых.

Раздрукаваць Захаваць

Складнікі

  

• 250 г маліны (можна замарожанай)
• 200 г вяршкоў 30%
• 3 ст.л. прасэка ці шампанскага
• 4 ст.л. карычневага цукру

Гатаванне

 

• Пакладзіце маліну ў блэндэр, дадайце прасэка (шампанскае) і добра ўзбіце. Працадзіце пюрэ праз сіта ці марлю (у мяне зручней і якасней атрымліваецца з марляй), каб не засталося костак ад маліны.
  
• У невялікім рондалі злучыце вяршкі і цукар. Пастаўце на невялікі агонь і ўвесь час памешваючы, награвайце вяршкі, пакуль цукар не растопіцца. Пасля таго на моцным агні давядзіце да кіпення і кіпяціце 2 хвіліны.
  
• Зніміце рондаль з агню, дадайце ў вяршкі малінавае пюрэ і перамяшайце, пакіньце астуджацца на 15 хвілін.
  
• Разлійце пасэт у 2 невялікія формы і пакіньце астываць яшчэ на 30 хвілін.
  
• Праз 30 хвілін можна ўпрыгожыць пасэт сушанай малінай ці крошкамі печыва. Пастаўце ў лядоўню на 2 гадзіны да поўнага застывання.